La ministra de l’Ecologia, del Desvolopament Sostenable e de l’Energia, Delphine Batho, a declarat lo massís catalan de Canigó “grand sit de França” e n’a cambiat oficialament la denominacion francesa “Canigou” pel sieu nom catalan “Canigó”. La declaracion ofrís a la montanha un gra de proteccion màger e garentís la siá promocion, al ras de la rèsta dels sits remarcables de l’estat. Dins l’explicacion que fa lo ministèri, se considèra Canigó coma una “montanha sagrada dels catalans”.
 
La ministra Batho a signat la declaracion e a reconegut “la valor excepcionala de l’endrech, la qualitat del sieu estat de mantenença e l’interès coma projècte de preservacion, de gestion e de mesa en valor”. Canigó es la tresena zòna de montanha de l’estat francés declarada “grand sit” après lo Mont Blanc (en Arpitània) e la Val de Nevascha o Val de Clareia (en Occitània, en Briançonés).
 
Al començament de l’an se faguèt una campanha impulsada pel Conselh General dels Pirenèus Orientals e la Region de Lengadòc-Rosselhon per demandar la declaracion de “grand sit de França” e la recatalanizacion del nom.